Туркия чемпионатининг 33-тури доирасида Истанбулнинг «Башакшеҳир» жамоаси ўз майдонида «Самсунспор» клубини қабул қилди. Ўзбекистон миллий терма жамоаси аъзолари Элдор Шомуродов ва Аббосбек Файзуллаев ҳаракат қилаётган ушбу клуб навбатдаги муҳим ғалабани қўлга киритди.

Учрашув майдон эгаларининг тўлиқ устунлигида ўтди ва 3:0 ҳисобидаги йирик ғалаба билан якунланди. Эътиборлиси шундаки, ўйин тақдирини ҳал қилган голлардан иккитасига айнан ўзбекистонлик легионерлар муаллифлик қилишди.

Учрашувнинг бор-йўғи 6-дақиқасидаёқ Элдор Шомуродов пенальтидан ҳисобни очиб, жамоасини олдинга олиб чиқди. Тажрибали ҳужумчи ўйинни асосий таркибда бошлаб, уни тўлиқ ўтказди ва ўзининг фаол ҳаракатлари билан рақиб ҳимоячиларига катта қийинчилик туғдирди.

Ўйиннинг 70-дақиқасида захирадан майдонга тушган истеъдодли ярим ҳимоячи Аббосбек Файзуллаев ҳам ўз номини таблога ёздириб қўйишга муваффақ бўлди. У 78-дақиқада рақиб дарвозасини аниқ нишонга олиб, якуний ҳисобнинг йирик кўриниш олишини таъминлади. Шунингдек, «Башакшеҳир»нинг яна бир голига 43-дақиқада Сари муаллифлик қилди.

Туркия Суперлигаси. 33-тур
«Башакшеҳир» – «Самсунспор» — 3:0
Голлар: Шомуродов (6), Сари (43), Файзуллаев (78).

Ушбу ғалабадан сўнг «Башакшеҳир» очколари сонини 54 тага етказиб, турнир жадвалида 6-ўринга кўтарилиб олди. «Самсунспор» эса 48 очко билан 7-поғонада бормоқда.