Англиянинг «Манчестер Юнайтед» клуби «Аталанта» ярим ҳимоячиси Эдерсонни ўз сафига қўшиб олиш ҳаракатларини давом эттирмоқда. UtdReport хабарига кўра, «қизил иблислар» бир неча ҳафтадан буён воситачилар орқали бразилиялик футболчининг вакиллари билан музокара олиб бормоқда.
Манбанинг таъкидлашича, инглиз гранди спорт директори Жейсон Уилкокс футболчининг иқтидорини юқори баҳолаган. Ўз навбатида, ярим ҳимоячининг агенти ҳам ушбу трансфер амалга ошишидан манфаатдор. Ҳозирча клублар ўртасида якуний келишувга эришилмаган бўлса-да, «Юнайтед»нинг қизиқиши жиддий экани айтилмоқда.
Маълумот учун, 26 ёшли Эдерсоннинг «Аталанта» билан шартномаси келгуси йилнинг ёзида ниҳоясига етади. Transfermarkt портали футболчининг бозор қийматини 40 миллион еврога баҳолаган.
