«Барселона» ҳужумчиси Рафинья Диас Испания Ла Лигаси 35-тури доирасидаги «Реал»га қарши марказий баҳс олдидан ўз фикрлари билан ўртоқлашди.

«Бизни жуда қийин ўйин кутаётганини биламиз. «Реал»да ҳали чемпионлик учун математик имкониятлар сақланиб қолмоқда, шунинг учун рақиб шунчаки таслим бўлмайди. Албатта, агар ғалаба қозониб, чемпионликни нақд қилсак, буни муносиб нишонлаймиз», — дейди бразилиялик вингер Movistar нашрига берган интервьюсида.

Қайд этиш жоизки, Рафинья март ойи якунидан буён жароҳати сабабли майдонга тушмаётган эди. Яқиндагина сафга қайтган «кўк-анорранглилар» етакчисининг мадридликларга қарши баҳсда захирадан майдонга тушиши кутилмоқда.

Эслатиб ўтамиз, «Барселона» — «Реал» учрашуви Тошкент вақти билан соат 00:00 да (11 майга ўтар кечаси) бошланади.