«Barselona» hujumchisi Rafinya Dias Ispaniya La Ligasi 35-turi doirasidagi «Real»ga qarshi markaziy bahs oldidan o‘z fikrlari bilan o‘rtoqlashdi.

«Bizni juda qiyin o‘yin kutayotganini bilamiz. «Real»da hali chempionlik uchun matematik imkoniyatlar saqlanib qolmoqda, shuning uchun raqib shunchaki taslim bo‘lmaydi. Albatta, agar g‘alaba qozonib, chempionlikni naqd qilsak, buni munosib nishonlaymiz», — deydi braziliyalik vinger Movistar nashriga bergan intervyusida.

Qayd etish joizki, Rafinya mart oyi yakunidan buyon jarohati sababli maydonga tushmayotgan edi. Yaqindagina safga qaytgan «ko‘k-anorranglilar» yetakchisining madridliklarga qarshi bahsda zaxiradan maydonga tushishi kutilmoqda.

Eslatib o‘tamiz, «Barselona» — «Real» uchrashuvi Toshkent vaqti bilan soat 00:00 da (11 mayga o‘tar kechasi) boshlanadi.