"Ал-Қодисия" бош мураббийи Брендан Рожерс Криштиану Роналду билан боғлиқ кўнгилни юмшатувчи хотирасини сўзлаб берди.

"Бизнинг алоқаларимиз жуда узоқ тарихга эга. Мен "Челси"да ёш мураббий бўлиб ишлаб юрган кезларимда онам "Манчестер Юнайтед"га қарши ўйинга келганди. Мен "Челси"да ишлашимга қарамай, Роналду унинг энг севимли футболчиси эди ва у Криштиану билан танишишни жуда истарди.

Ўйиндан сўнг Криштиану билан гаплашдим ва онам билан саломлашиб қўя олишини сўрадим — у рози бўлди. Онам 2010 йилда вафот этган. Ўшанда унинг онам билан танишгани ҳам мен учун, ҳам онам учун дунёларга арзигулик воқеа бўлганди. У онамга вақт ажратди, бирга суратга тушди, ширин сўзлар айтди — бу хотира мен билан бир умрга қолди. Айнан ўша лаҳзадан бошлаб орамизда ўзаро ҳурмат пайдо бўлган.

У фаолияти давомида ақл бовар қилмас ютуқларга эришди ва эҳтимол, кўплаб инсонларнинг Европа ва бутун дунёдан бу ерга келишига айнан у сабабчи бўлгандир. Лекин мен ўша лаҳзани ҳеч қачон унутмайман, чунки бу онам ва мен учун жуда қадрли эди. Онам "Манчестер Юнайтед" мухлиси эмасди, у шунчаки футболни севарди ва ҳақиқий буюк ўйинчи кимлигини тушунарди", — деди Рожерс.