Бельгиялик ҳужумчи Ромелу Лукакунинг агенти Федерико Пасторелло ўз мижозини Италиянинг «Милан» клубига жойлаштириш устида иш олиб бормоқда. Бу ҳақда Tuttosport нашри хабар бермоқда.
Маълум қилинишича, «россонерилар» бош мураббийи Массимилиано Аллегри анчадан бери тажрибали ҳужумчининг иқтидорини юқори баҳолаб келади. Лукакунинг ўзи ҳам «Интер»даги фаолияти давомида яшаган Милан шаҳрига қайтишга қарши эмас.
«Ромелу бўлажак жаҳон чемпионатини юқори даражада ўтказишига ва келаси мавсумда Европанинг энг яхши клубларидан бирида жой эгаллашига ишончим комил», — дея таъкидлади футболчининг агенти.
Шу билан бирга, Пасторелло Лукакунинг Бельгия чемпионатига, хусусан, «Андерлехт» клубига қайтиши ҳақидаги тахминларни рад этди.
