Belgiyalik hujumchi Romelu Lukakuning agenti Federiko Pastorello o‘z mijozini Italiyaning «Milan» klubiga joylashtirish ustida ish olib bormoqda. Bu haqda Tuttosport nashri xabar bermoqda.
Ma’lum qilinishicha, «rossonerilar» bosh murabbiyi Massimiliano Allegri anchadan beri tajribali hujumchining iqtidorini yuqori baholab keladi. Lukakuning o‘zi ham «Inter»dagi faoliyati davomida yashagan Milan shahriga qaytishga qarshi emas.
«Romelu bo‘lajak jahon chempionatini yuqori darajada o‘tkazishiga va kelasi mavsumda Yevropaning eng yaxshi klublaridan birida joy egallashiga ishonchim komil», — deya ta’kidladi futbolchining agenti.
Shu bilan birga, Pastorello Lukakuning Belgiya chempionatiga, xususan, «Anderlext» klubiga qaytishi haqidagi taxminlarni rad etdi.
