Франциянинг «Лилль» клуби ҳужумчиси Матиас Фернандес-Пардо «Манчестер Сити» қизиқишлари доирасига тушди. Бу ҳақда таниқли журналист Экрем Конур хабар бермоқда.
Манбанинг таъкидлашича, «шаҳарликлар» 21 ёшли ҳужумчининг вакиллари билан илк музокараларни ўтказиб улгурган. Бундан ташқари, инглиз гранди «Лилль» раҳбарияти билан ҳам боғланган бўлиб, француз клуби ўз иқтидори учун 60 миллион евро миқдорида нарх белгилаган.
Ёш испаниялик футболчининг фаолиятини «Манчестер Сити»дан ташқари Мадриднинг «Атлетико» ҳамда Лондоннинг «Арсенал» клублари ҳам синчковлик билан кузатиб бормоқда.
Маълумот учун, Фернандес-Пардо жорий мавсумда барча мусобақаларда 39 та ўйинда майдонга тушиб, 8 та гол ва 7 та голли узатмага муаллифлик қилди. Унинг «Лилль» билан амалдаги шартномаси 2029 йилнинг ёзига қадар мўлжалланган.













