«Барселона» ҳужумчиси Ферран Торрес келаётган ёзги трансфер ойнасида клубини ўзгартиришга яқин турибди. Журналист Экрем Конурнинг хабар беришича, каталонияликлар футболчи билан амалдаги шартномани узайтириш ниятида эмас.

Манбага кўра, «кўк-анорранглилар» 2027 йилгача мўлжалланган келишувга эга Торресни сотишга тайёр. Ҳозирда футболчи учун курашда бир йўла бир нечта клублар, жумладан, «Ньюкасл», «Астон Вилла» ва «Милан» иштирок этмоқда. Итальян клуби футболчини кейинчалик сотиб олиш шарти билан ижарага олишни кўзлаётган бўлса, АПЛ вакиллари трансферни дарҳол амалга оширишга тайёр.

Қайд этилишича, «Астон Вилла» испаниялик ҳужумчи учун 65 миллион евро ажратишга қарор қилган. «Ньюкасл» учун эса Торрес ёзги трансферлар давридаги асосий мақсад бўлиб турибди.

Маълумот учун, Ферран Торрес жорий мавсумда барча турнирларда 46 та ўйинда майдонга тушиб, 20 та гол урди ва 2 та голли узатмани амалга оширди.