"Атлетико" Мадрид клубининг ёзги трансфер бозоридаги фаолияти ҳужумчи Хулиан Альвареснинг жамоадаги келажагига бевосита боғлиқ бўлиб турибди.

Cadena SER нашрининг хабарига кўра, мадридликларнинг кўплаб вакиллари аргентиналик форвард жамоадан кетишни истаётганлигини тахмин қилишмоқда. Клуб раҳбарияти футболчининг агентлари аллақачон "Барселона" билан алоқага чиққанидан хабардор. Шунингдек, "Арсенал" клуби билан ҳам музокаралар ўтказилган, бироқ "Манчестер Сити" собиқ аъзоси Англияга қайтишни хоҳламаяпти. "ПСЖ" ҳам Альвареснинг вакиллари мулоқот қилган жамоалар рўйхатидан жой олган.

Ҳозирча юқорида қайд этилган клубларнинг ҳеч бири расмий таклиф билан "Атлетико"га мурожаат қилгани йўқ. Мадрид клуби Альваресни сотиш ниятида эмас ва потенциал харидорлардан 100 миллион евродан кам бўлмаган миқдорда маблағ талаб қилмоқчи. Клуб менежерларининг фикрича, ҳозирги шароитда бирор-бир жамоа бундай катта харажатга қўл уриши амримаҳол.

Маълумот учун, жорий мавсумда Хулиан Альварес Ла Лига доирасида 29 та учрашувда майдонга тушиб, ўз ҳисобига 8 та гол ёздириб қўйган.