«Барселона» вингери Маркус Рэшфорд клубдаги келажаги ҳақидаги саволга жавоб берди. «Кўк-анорранглилар» инглиз футболчисини жорий мавсум якунига қадар «Манчестер Юнайтед»дан ижарага олишган эди. Ҳозирча ўйинчини жамоада сақлаб қолиш имкони бор-йўқлиги номаълум.
«Мен сеҳргар эмасман. Агар сеҳргар бўлганимда, «Барселона»да қолган бўлардим. Кўрамиз, воқеалар ривожи қандай кечади», — дея BBC Sport «қизил иблислар» тарбияланувчисининг ўйиндан кейинги интервьюсидан иқтибос келтиради.
Маркус Рэшфорд каталонияликларга Мадриднинг «Реал» клубини мағлуб этишда (2:0) ва Ла Лига чемпионлигини муддатидан олдин қўлга киритишда ёрдам берди. 28 ёшли футболчи «Эл-Класико»нинг 9-дақиқасида жарима зарбасидан рақиб дарвозасини ишғол қилиб, ҳисобни очган эди.
