«Барселона» ярим ҳимоячиси Френки де Йонг Ла Лигадаги чемпионлик ҳақида ўз фикрларини билдирди. Каталонияликлар 35-турда ўз майдонларида «Реал»ни мағлуб этиб (2:0), титулни расмийлаштиришди.
«Ушбу чемпионлик ўз уйимизда, «Реал»га қарши ўйинда қўлга киритилгани билан ҳам алоҳида аҳамиятга эга. Энди бу зафарни мухлисларимиз билан биргаликда нишонлашимиз керак.
Флик жамоа учун жуда муҳим инсон. Унинг ғоялари жуда аниқ, шу билан бирга, у футболчиларга катта эркинлик беради. Бунинг натижасида биз ўз маҳоратимизни тўла намоён эта оляпмиз.
Ҳар бир совринни чин дилдан байрам қилиш лозим. Айниқса, бутун мавсум давом этадиган Ла Лигадаги ғалабани. Биз Испанияда яққол энг кучли жамоа эканлигимизни кўрсатдик. Албатта, биз Чемпионлар лигасида ҳам зафар қучишни истаймиз, бу бизнинг асосий мақсадимиз. Келаси йили бизда яна бир имконият бўлади», — деди де Йонг.
