«Милан» А Сериянинг 36-турида «Аталанта»дан қабул қилинган мағлубиятдан (2:3) сўнг Миланелло базасида ўқув-машғулот йиғинини ўтказади. Бу қарор душанба оқшомида клуб раҳбарияти билан ўтказилган йиғилишдан сўнг қабул қилинди.

Ҳозирда Массимилиано Аллегри жамоаси 67 очко билан турнир жадвалида 4-ўринни эгаллаб турибди. «Рома»да ҳам шунча очко бор, бироқ миланликлар ўзаро ўйинлар натижасига кўра устунликка эга.

17 май куни «Милан» сафарда «Женоа»га қарши майдонга тушади. Ушбу йиғиндан кўзланган асосий мақсад — Чемпионлар лигаси йўлланмаси ҳал бўладиган ҳал қилувчи паллада жамоани жипслаштиришдир.

Sky Sport хабарига кўра, бугун дам олган «россонерилар» аъзолари сешанба куни машғулотларга қайтади, йиғиннинг ўзи эса чоршанба, 13 май кунига режалаштирилган.

Спорт директори Игли Таре «Женоа» билан ўйин олдидан йиғин ўтказилиши мумкинлиги ҳақида шундай деди:

«Ўйиндан сўнг мураббий билан вазиятни таҳлил қилдик. Биз улар (футболчилар) билан гаплашиб, атрофдаги воқеалар кучимизни сўраётган бўлиши мумкинлигини, лекин руҳий жиҳатдан ўзгаришимиз кераклигини айтдик. Жамоа етакчиларининг реакцияси тўғри бўлди, аммо энди гапдан ишга ўтишимиз керак.

Якшанба куни бизни муҳим баҳс кутмоқда. Вазиятни яхшироқ тушуниш ва таҳлил қилиш учун бир неча кунга йиғинга йўл олишимиз мумкин», — деди Таре «Аталанта» билан ўйиндан сўнг.