«Манчестер Юнайтед»нинг собиқ футболчиси Гари Невилл «ПСЖ» ва «Арсенал» ўртасида кечадиган Чемпионлар лигаси финали ҳақидаги мулоҳазалари билан ўртоқлашди.

«Арсенал» кучли руҳий туртки олди. Улар «Атлетико»ни мағлуб этишди, «Манчестер Сити»нинг «Эвертон» билан ўйинда очко йўқотганини кузатишди ва шундан сўнг «Вест Хэм» устидан ғалаба қозонишди (1:0).

Бундай ғалаба 3:0 ҳисобидаги муваффақиятдан кўра анча қадрлироқдир. Албатта, ҳар доим осон ғалаба қозонишни хоҳлайсан, лекин бундай натижалар жамоага ишонч, чидамлилик ва янги куч бағишлайди.

Чемпионлар лигаси финалида улар ўзларининг ҳимояланиш қобилиятлари ҳақида, ўзларидан кучлироқ бўлган жамоадан 90 дақиқа давомида қандай қилиб устун келиши мумкинлиги ҳақида ўйлашлари керак.

Чунки «ПСЖ» улардан кучлироқ. Бу ҳақиқатдан қочиб бўлмайди. Ҳозирги кунда «ПСЖ» «Арсенал»дан яхшироқ шаклланган ва улар буни охирги икки мавсум давомида исботлаб келишмоқда.

Микель Артета учун бу янги даражага чиқиш имконияти, Чемпионлар лигасидаги ғалаба ақл бовар қилмас ютуқ бўлган бўларди.

22 йил ичида илк бор АПЛда зафар қучиш — бу улкан натижа, аммо бунга қўшимча равишда Чемпионлар лигаси титулини қўлга киритиш ҳайратланарли муваффақиятдир.

Назаримда, ҳозир «Арсенал»нинг АПЛда ғолиб чиқиши учун айни муносиб вақт, лекин Чемпионлар лигасидаги ғалаба учун эмас.

Менимча, ҳозир «ПСЖ»нинг кетма-кет иккинчи бор чемпион бўлиши учун энг қулай пайт. Луис Энрике эса бу натижага эришган «илоҳий» мураббийлар қаторидан жой олиши мумкин», — деди Гари Невилл Sky Sports подкастида.