«Реал» ва Испания терма жамоасининг собиқ ҳимоячиси Серхио Рамос «Севилья» клубини сотиб олиш жараёнини якунлади ва клубнинг янги эгасига айланди. Бу ҳақда инсайдер Фабрицио Романо ўзининг X ижтимоий тармоғидаги саҳифасида хабар бермоқда. Манбага кўра, келишув аллақачон ниҳоясига етган.
Маълум қилинишича, клубни сотиб олишда футболчининг тўнғич акаси ва агенти Рене Рамос ҳам иштирок этмоқда. Расмий баёнот берилишидан олдин Рамоснинг ҳуқуқшунослари томонидан тегишли ҳуқуқий қадамлар қўйилиши кутилмоқда.
Серхио Рамос «Севилья» клуби тарбияланувчиси ҳисобланади. У айнан ушбу клубдан 2005 йилда «Реал Мадрид»га ўтган эди. 2023 йилнинг сентябрида испаниялик футболчи қадрдон клубига қайтиб, у ерда 2023/2024 йилги мавсумни ўтказди. 2026 йил бошидан буён 40 ёшли ўйинчи эркин агент мақомида бўлиб турибди.
