«Комо» бош мураббийи Сеск Фабрегас «Бенфика» устози Жозе Моуриньонинг «Реал Мадрид» бошқарувига қайтиши ҳақидаги хабарларга ўз муносабатини билдирди.

«Бу мени ҳайрон қолдирмайди, Моуриньо — буюк мураббий. Бир неча ой олдин у билан Лондонда кўришиб қолгандик ва бундан жуда хурсанд бўлгандим. У жуда кучли тайёргарликка эга мутахассис ва буни қаерда ишламасин, ҳатто ҳозир «Бенфика»да ҳам исботлаб келмоқда. Мен учун у доим мураббийлик лавозимига энг лойиқ номзодлардан бири бўлиб қолади», — деди Фабрегас El Partidazo de COPE нашрига берган интервьюсида.

Эслатиб ўтамиз, Сеск Фабрегас футболчилик фаолияти давомида «Челси»да айнан Моуриньо қўл остида тўп сурган. Португалиялик мутахассис 2014 йилда испаниялик ярим ҳимоячини «Барселона»дан Лондон клубига таклиф қилган эди.