Мадриднинг «Реал» клуби президенти Флорентино Перес жорий мавсумда ҳакамлар қарорлари сабаб «қаймоқранглилар» 18 очкодан маҳрум бўлганини айтди. Шунингдек, 79 ёшли функционер ўз раҳбарлиги даврида «Қироллик клуби» Ла Лигада янада кўпроқ чемпионликка эришиши керак бўлганини таъкидлади.
— Қандай қилиб жаҳлим чиқмасин? Мен еттита Ла Лига чемпионлигини қўлга киритдим, аммо улар 14 та бўлиши керак эди. Мени еттитасидан маҳрум қилишди. Жорий мавсумда эса биздан 18 очкони ўғирлаб кетишди. Бу «тузум интеллектуаллари» бизга зарар етказмоқда, — деди Перес матбуот анжуманида.
Испания чемпионатининг 35 туридан кейин «Реал» 77 очко билан мусобақа жадвалида иккинчи ўринни эгаллаб турибди.
Флорентино Перес «Реал» президенти лавозимида 2000–2006 йилларда ишлаган. У 2009 йилда мазкур вазифага яна қайтган эди.













