«Аталанта»да навбатдаги мураббий ўзгариши кутилмоқда. Бергамоликларнинг ҳозирги устози Раффаэле Палладино, катта эҳтимол билан, тез орада ўз лавозимини тарк этади.
Журналист Николо Скиранинг маълумотига кўра, клуб раҳбарияти мавсум якунлангач 42 ёшли мутахассис билан ҳамкорликни тўхтатишни режалаштирган. Раффаэле Палладино ушбу лавозимни ўтган йилнинг ноябрь ойида эгаллаган эди.
Айни дамда, 36-турдан сўнг «Аталанта» Серия А турнир жадвалида еттинчи поғонани эгаллаб турибди. Қайд этиш жоизки, Бергамо жамоасининг бундан юқорироқ ўринга кўтарилиш имконияти қолмаган. Палладинонинг амалдаги шартномаси келгуси йилнинг ўрталарига қадар мўлжалланган эди, бироқ томонлар мавсум охиридаёқ ажралиши мумкин.
