«Atalanta»da navbatdagi murabbiy o‘zgarishi kutilmoqda. Bergamoliklarning hozirgi ustozi Raffaele Palladino, katta ehtimol bilan, tez orada o‘z lavozimini tark etadi.
Jurnalist Nikolo Skiraning ma’lumotiga ko‘ra, klub rahbariyati mavsum yakunlangach 42 yoshli mutaxassis bilan hamkorlikni to‘xtatishni rejalashtirgan. Raffaele Palladino ushbu lavozimni o‘tgan yilning noyabr oyida egallagan edi.
Ayni damda, 36-turdan so‘ng «Atalanta» Seriya A turnir jadvalida yettinchi pog‘onani egallab turibdi. Qayd etish joizki, Bergamo jamoasining bundan yuqoriroq o‘ringa ko‘tarilish imkoniyati qolmagan. Palladinoning amaldagi shartnomasi kelgusi yilning o‘rtalariga qadar mo‘ljallangan edi, biroq tomonlar mavsum oxiridayoq ajralishi mumkin.
