Ўзбекистоннинг биринчи рақамли ракеткаси Денис Истомин Нью-Йоркда давом этаётган АҚШ очиқ чемпионатининг кучли 16 нафар теннисчилари қаторига кирди. Бу ҳозирча албатта. У учинчи босқичда ўзининг мураккаб рақибларидан бири Андреас Сеппини оғир кечган ўйинда мағлуб этишга муваффақ бўлди.

Ҳамюртимиз ўйинни анча кучли бошлади ва дастлабки 2 сетни ўз фойдасига ҳал қилди — 6-3, 6-4. Учинчи сетдан бошлаб Сеппи вазиятни ўзгартира бошлади ва кейинги икки сетни ўз фойдасига ҳал қилди — 6-2, 6-3.

Ўйин тақдирини ҳал қилган бешинчи сетда эса Денис ирода ва жисмоний жиҳатдан кучли эканини намойиш қилди. Сетни Истомин бошлади ва ўз геймини очкони қўлга киритди. У рақибининг биринчи геймидаёқ очкога эга бўлиб, ҳисобни 2-0га етказди. Шундан сўнг итальян теннисчиси бироз ўз ўйинини кучайтирди ва ҳар сафар сафар ўзбекистонлик теннисчининг геймида брейк-поинтларга эга бўлаверди. Бироқ Истомин ўз геймларини бой бермади ва боз устига, рақибнинг яна 1та геймини қўлга киритди. Ҳисоб 5-1га етганидан кейин ҳамюртимиз сўнгги геймни осонлик билан қўлга киритди — 6-1.

Бунгача мазкур теннисчилар мазкур мавсумнинг ўзида "Улкан тож" туркумига кирувчи Австралия очиқ чемпионати ва Уимбльдон мусобақаларида тўқнаш келишганди ҳамда ўша ўйинлар ҳам 5 сет давом этиб, Сеппининг қўли баланд келганди. Ўз навбатида италиялик теннисчи Истомин билан ўзаро тўқнашувларини "классика" деб атаганди.

Бунгача Алмагро (Испания) ва Тобиас Камке (Германия)ни мағлуб этган Д.Истомин 4-босқичда мусобақанинг 3-тартибли рақамли теннисчиси Энди Мюррей билан куч синашади. Британиялик ракетка устаси 3-даврада Флориан Майерни мусобақадан чиқариб юборди. Дарвоқе, Мюррей "US Open"нинг амалдаги ғолиби ҳисобланади.

АҚШ очиқ чечмпионати, 3-давра
Денис Истомин (Ўзбекистон) - Андреас Сеппи (Италия) - 3:2 (6-3, 6-4, 2-6, 3-6, 6-1)