Миланнинг «Интер» клуби сардори Лаутаро Мартинес жамоанинг чемпионликни қўлга киритганидан кейинги кайфияти ва мотивацияси ҳақидаги саволларга жавоб берди. Бугун «нерадзуррилар» Италия Кубоги финалида «Лацио»га қарши майдонга тушади.
Кўпчилик Рим клуби ушбу баҳсга юқорироқ мотивация билан ёндашиши мумкинлигини тахмин қилмоқда. Бироқ Лаутаро жамоанинг профессионаллигига шубҳа қилмаяпти.
«Биз профессионаллармиз, клубимизни ва рақибларимизни ҳурмат қиламиз. Ўзлигимизга содиқ қолишимиз ва охиригача қаттиқ меҳнат қилишда давом этишимиз керак. Олдинда Италия Кубоги финали ва А Серияда яна иккита ўйин бор. Шанба куни «Лацио»га қарши кечган баҳсда (3:0) Скудеттони қўлга киритганимиздан кейин ҳам тўхтаб қолмаслигимизни исботладик», — деди Мартинес клуб телеканалига берган интервьюсида.
Эслатиб ўтамиз, Италия Кубогининг финал учрашуви Тошкент вақти билан соат 00:00 да старт олади.
