Бразилия терма жамоаси бош мураббийи Карло Анчелотти Жозе Моуриньонинг Мадриднинг «Реал» клубига қайтиши ҳақидаги хабарларга муносабат билдирди. Ҳозирда Лиссабоннинг «Бенфика» клубида фаолият юритаётган португалиялик мутахассис «қироллик клуби» билан келишувга яқин турибди.

Агар кутилмаган вазиятлар юзага келмаса, «The Special One» орадан 13 йил ўтиб яна «қаймоқранглилар» бошқарувини қўлга олади.

«Агар Моуриньо «Реал»га қайтса, ундан жуда хурсанд бўламан. У илгари ишлаган барча жойларида бўлгани каби, Мадридда ҳам фантастик ишни амалга ошириши мумкин», — дея Анчелоттининг сўзларини келтиради Madrid Zone.

Эслатиб ўтамиз, италиялик мутахассис ўтган йилнинг май ойида Мадрид грандини тарк этиб, Бразилия миллий терма жамоаси бошқарувига ўтган эди.