Бельгиялик ҳужумчи Ромелу Лукаку ва «Наполи» клуби амалдаги шартномани ўзаро келишув асосида бекор қилишга қарор қилишди.
La Gazzetta dello Sport нашрининг хабар беришича, эндиликда тажрибали футболчи фаолиятини Саудия Арабистони ёки Туркия чемпионатларидан бирида давом эттириши мумкин. Аввалроқ ҳужумчи ўз хизматларини «Милан» клубига таклиф қилгани ҳақида ҳам хабарлар тарқалган эди.
Эътиборли жиҳати, чоршанба куни Ромелу Лукаку 33 ёшни қарши олди. «Наполи» клуби ижтимоий тармоқлардаги расмий саҳифалари орқали футболчини туғилган куни билан табриклашга ҳам улгурди.
Маълумот учун, Италия А Серияси якунланишига икки тур қолганда «Наполи» турнир жадвалида иккинчи ўринни эгаллаб турибди. Жамоа ҳали Чемпионлар Лигаси йўлланмасини нақд қилганича йўқ.
