«Манчестер Юнайтед» ярим ҳимоячиси Каземиро жамоадоши Кобби Майнунинг ўйини борасидаги фикрлари билан ўртоқлашди.

Бразилиялик тажрибали футболчи Рио Фердинанднинг подкастида ёш иқтидор эгасининг маҳоратини алоҳида эътироф этди.

«Майну — ақл бовар қилмайдиган футболчи. У «олтилик» эмас, балки соф «саккизлик». Унинг тўп билан муомаласи кишини ҳайратга солади. Кобби тўпга эгалик қилишни жуда яхши кўради, унга тўп керак ва у ўйинни назорат қила олади. Энг муҳими, у тўпни деярли йўқотмайди. Майнуда юқори сифат бор», — дейди Каземиро.

Маълумот учун, Кобби Майну «Манчестер Юнайтед» академияси тарбияланувчиси ҳисобланади. Унинг клуб билан амалдаги шартномаси 2031 йилнинг 30 июнига қадар мўлжалланган.

Жорий мавсумда ярим ҳимоячи «қизил иблислар» сафида барча турнирларда 28 та учрашувда майдонга тушиб, ўз ҳисобига 1 та гол ва 3 та голли узатмани ёздириб қўйди.