«Катта дубулға» туркумидаги мусобақаларнинг 22 карра ғолиби, испаниялик теннисчи Рафаэль Надаль Мадриднинг «Реал» клуби президенти сайловларидаги иштироки ҳақидаги миш-мишларга муносабат билдирди. Собиқ спортчи ва клуб мухлиси ушбу лавозим учун номзодини қўйишини тасдиқламади.
Аввалроқ «Реал»нинг амалдаги президенти Флорентино Перес муддатидан аввалги сайловлар ўтказилишини эълон қилган, ОАВда эса Рафаэль Надаль ушбу сайловда иштирок этиши мумкинлиги ҳақида хабарлар тарқалган эди.
«Мени “Реал” президенти лавозимига эҳтимолий номзод сифатида кўрсатаётган хабарларни ўқидим. Шуни аниқлаштирмоқчиманки, бу маълумотлар ҳақиқатга тўғри келмайди», — деб ёзди Рафаэль Надаль ижтимоий тармоқларда.













