«Барселона» ҳужумчиси Роберт Левандовски фаолиятини Саудия Арабистонининг «Ал-Ҳилол» клубида давом эттириши мумкин. SportoweFakty нашрининг хабар беришича, Ар-Риёд клуби 37 ёшли поляк футболчисига йилига 90 миллион евро маош таклиф қилган.
Маълумотларга кўра, Левандовски ушбу молиявий жиҳатдан ўта манфаатли таклифни қабул қилишга жуда яқин турибди. Ҳужумчининг каталонияликлар билан амалдаги шартномаси 2026 йилнинг ёзида ўз ниҳоясига етади, бу эса унинг келаси мавсумни бошқа жамоада бошлаши эҳтимолини оширади.
Роберт Левандовски 2022 йилдан буён «кўк-анорранглилар» шарафини ҳимоя қилиб келмоқда. Жорий мавсумда у барча турнирларда 18 та гол ва 4 та голли узатмани ўз ҳисобига ёздириб қўйишга муваффақ бўлди.
«Ал-Ҳилол» айни дамда Саудия Арабистони чемпионатида иккинчи ўринда бормоқда. Жамоа ўтган мавсумда кумуш медалларни қўлга киритган бўлса, ундан олдинги мавсумда мамлакат чемпионлигини расмийлаштирган эди.
