Аргентинанинг «Тальерес» клуби бош мураббий Карлос Тевес билан хайрлашганини расман эълон қилди. Кордова шаҳри жамоаси собиқ ҳужумчининг истеъфоси ҳақида ўз расмий сайтида маълумот берди.
Клуб раҳбарияти Тевесга амалга оширган ишлари учун миннатдорчилик билдириб, уни илиқ хайрлашув сўзлари билан кузатди.
«Карлос Тевеснинг инсоний фазилатлари, жамоадаги обрўси ва меҳнатсеварлигини алоҳида эътироф этамиз», — дейилади клуб баёнотида.
Маълумот учун, Тевес 2025 йилнинг ёзидан буён «Тальерес»ни бошқариб келаётган эди. Айни дамда жамоа Аргентина Примерасида пешқадамдан 5 очко ортда қолган ҳолда, турнир жадвалининг 4-поғонасида бормоқда.
Карлос Тевес футболчилик фаолиятини 2021 йилда якунлаган эди. Мураббий сифатида эса у «Тальерес»га қадар «Росарио Сентраль» (2022) ва «Индепендьенте» (2023-2024) клубларида ишлаган.
