Римнинг «Лацио» клуби Италия Кубоги финалида Миланнинг «Интер» жамоасига 0:2 ҳисобида имкониятни бой берди. Римликлар бош мураббийи Маурицио Сарри мағлубиятдан сўнг ўз фикрларини билдириб, жамоаси йўл қўйган хатоларга тўхталди.

Саррининг фикрича, «Лацио» рақибга голларни «туҳфа қилган».

«Биз рақибга иккита совға бердик ва шу билан ҳаммаси барбод бўлди. Иккинчи бўлимда ўйинга қайтиш учун имкониятларимиз бор эди, лекин улардан фойдалана олмадик. Қолаверса, тан олиш керак, биз ўзимиздан анча кучли бўлган жамоага қарши ўйнадик», — дея мутахассиснинг сўзларини келтиради cittaceleste.it.

Эслатиб ўтамиз, «Интер» ушбу ғалаба орқали жорий мавсумда «олтин дубль» қайд этди — жамоа ҳам мамлакат чемпионати, ҳам кубок баҳсларида зафар қучди. «Лацио» эса охирги марта 2019 йилда Италия Кубогида ғолиб чиққан эди.