Франция терма жамоаси ярим ҳимоячиси Эдуардо Камавинганинг мундиалга бориши сўроқ остида қолмоқда. Терма жамоа бош мураббийи Дидье Дешам Жаҳон чемпионатига йўл оладиган футболчиларнинг тўлиқ рўйхатини бугун, 14 май оқшомида TF1 телеканали эфирида расман эълон қилади.

AS нашрининг хабарига кўра, сўнгги ҳафталарда «Реал Мадрид» футболчисининг турнирдаги иштироки жиддий шубҳа остига олинган. Бунга Камавинганинг жорий мавсумдаги беқарор ўйини, «Бавария»га қарши баҳсдаги четлатилиши ва майдон марказидаги юқори рақобат сабаб бўлмоқда.

Март ойидаги ўйинлар ҳолатига кўра, Камавинга ярим ҳимоячилар рейтингида Орельен Тчуамени, Уоррен Заир-Эмери, Н’Голо Канте ва Адриен Рабьодан кейинги, яъни бешинчи танлов сифатида кўрилган. Шунингдек, «Лион»да ажойиб мавсумни ўтказган Корентен Толиссо ҳам унга қўшимча рақобат туғдириши мумкин.