Мадриднинг «Реал» клуби ярим ҳимоячиси Жуд Беллингем Ла Лиганинг 36-туридан ўрин олган «Овьедо»га қарши учрашувдаги голидан кейин мухлислардан узр сўради.

Маълум бўлишича, ўйин бошланишидан аввал баъзи «Реал» мухлислари жамоа футболчиларини чигилёзди машғулотлари пайтида ҳуштакбозлик билан қарши олган. Беллингем эса 80-дақиқада гол урганидан сўнг мухлислар томон қараб узр ишорасини қилди.

Эслатиб ўтамиз, 35-турда «Реал» ўз майдонида «Барселона»га 0:2 ҳисобида мағлуб бўлди ва ушбу натижадан кейин каталонияликлар муддатидан аввал Испания чемпионига айланган эди.

Шунингдек, аввалроқ «қаймоқранглилар» ярим ҳимоячилари Федерико Вальверде ҳамда Орельен Тчуамени ўртасида жанжал келиб чиққанлиги ҳақида хабарлар тарқалганди.

Беллингем жорий мавсум барча мусобақаларда 26 та учрашувда майдонга тушиб, 7 та гол ва 5 та голли узатма муаллифи бўлди.

Испания — Ла Лига, 36-тур
14 май 2026 йил. Мадрид. «Сантьяго Бернабеу» стадиони.
«Реал» — «Овьедо» 2:0
Голлар: Гонсало Гарсия 44, Беллингем 80.