УЕФАнинг Назорат, этика ва интизом қўмитаси Мадриднинг «Атлетико» клубини 15 минг евро миқдорида жаримага тортди. Бунга Чемпионлар лигаси ярим финалида «Арсенал»га қарши ўтган биринчи учрашувдаги ҳолат сабаб бўлди.
Мадриддаги «Метрополитано» стадионида бўлиб ўтган баҳс давомида «Атлетико» мухлислари майдонга турли буюмларни улоқтирган. Улар орасида ҳожатхона қоғози ҳам бўлган. УЕФА мазкур ҳаракатни меҳмон жамоага нисбатан “ҳурматсизлик” сифатида баҳолаган.
Интизом қўмитаси бу каби ҳаракатлар футболчилар ва ҳакамлар хавфсизлигига таҳдид солиши мумкинлигини таъкидлаб, қоидалар бузилганини қайд этди.
Жарима УЕФА Назорат, этика ва интизом қўмитаси ҳисоботи асосида қўлланилди.
Икки ўйин натижасига кўра «Атлетико» «Арсенал»га мағлуб бўлиб, мусобақани тарк этган эди.













