Бугун Европада ўйинчилар олди-бердиси, қисқа қилиб айтганда трансферларни расмийлаштиришнинг сўнгги куни. Бугундан кеч қолган клублар ўзлари кўзлаган футболчиларни қўлга кирита олмайдилар ва бу ишни қишки мавсумга қолдирадилар. Демак, бугун трансфер "қозони" қайнайдиган кун.
Бир йилда икки марта бўладиган мана шундай "қайноқ" кундан, ўз анъанамизга содиқ қолган ҳолда, трансфер янгиликларини онлайн тарзда эътиборингизга ҳавола қиламиз. Янгиликларни имкон қадар кун охиригача етказиб туришга ҳаракат қиламиз.
БОШЛАДИК!
Мадриднинг "Реал" клуби футболчиси Рикарду Кака "Милан"га қайтишга қарор қилди. Бу ҳақда миланликлар сайти хабар тарқатди. Манбада келтирилишича, Кака "Милан" билан икки йиллик шартнома имзолашга улгурган. Эслатиб ўтамиз, Кака 2003-2009 йилларда давомида "россонерлар" шарафини ҳимоя қилган.
65 миллионга сотиб, тўрт йилдан кейин бепулга олиш. Қойил. Ёки Каканинг бухгалтерлар тили билан айтганда, амортизацияси тугабдимикин? :)
"Реал" ҳам тинч тургани йўқ. Улар "Ливерпуль" ҳужумчиси Суаресни қўлга киритиш ниятидалар. Мабодо ушбу трансфер амалга ошадиган бўлса, Бенземе "Арсенал"га ўтиши мумкин.
Айтганча, "Арсенал" шунингдек, "Реал"нинг бошқа футболчилари - Ўзил ва Ди Марияга ҳам қизиқиш билдирмоқда. Ўзил эса "Арсенал"га ўтишни истамаяпти. Баъзилар унинг "Манчестер Юнайтед"дан таклиф кутаётганини таҳмин қилмоқдалар.
Ўтган йили "Уиган"дан Лондонга олиб келинган Виктор Мозес мавсумни "Ливерпуль" таркибида ижарада ўтказади.
"Манчестер Юнайтед" ва Маруан Феллайни трансфери ниҳоясига етиш арафасида.
Япониялик таянч ярим ҳимоячиси Макото Ҳасебе эса 2.5 миллион евро эвазига "Вольфсбург"дан "Нюрнберг"га ўтди. Уҳ, бунча қийин-а, бу немис жамоалариннг номлари :)
"Арсенал" Ўзилни энди олиб келишга яқин турганди, бозорга ПСЖ ҳам аралашди.
"Ливерпул" ҳимоя чизиғини кучайтирмоқда. Лиссабонинг "Спортинг"идан Тиаго Илори ва ПСЖ дан Мамаду Сако расман Рожерс шогирдларига айланишди. Бечора Уиздом :)
"Терек" клуби эса Голландиянинг "АЗ Алкмаар" жамоаси ҳужумчиси Йоханссонга қизиқиш билдирган. "Кавказда пишириб қўйибдими санга?" (с) :)
"Юнайтед" бугуннинг ўзида уч футболчини сотиб олмоқчи экан. Феллайни, Эррера, учинчиси ким экан-а?
"Ливепуль"нинг ўтган йилги омадсиз хариди Фабио Борини ижара асосида "Сандерленд"да тўп сурадиган бўлди.
Хотиржам бўлинглар, Стефан ал-Шаарави ҳеч қаерга сотилмас экан. Ўзил устида эса ҳақиқий жанг бошланиб кетди. ПСЖ 2 миллион кўпроқ пул ваъда қилаётганмиш...
"Челси" "Порту"дан 4.1 миллионга Кристиан Атсуни сотиб олиб, "Витесс"га ижарага берди.
"Чёта" тинчлик. Зерикмаслик учун битта латифа айтиб берайми? Антонио Валенсия Эврани олдига келиб дебди:
- Капитан, жамоамизни қанақа қилиб кучайтириш йўлини топдим!
- Ҳа, кетмоқчимисан?
"Вест Ҳэм" қанақадир "катта юлдуз"ни сотиб олишга ваъда бермоқда. Ким учун "катта"? "Гулливернинг саргузаштлари" эсга тушиб кетди :)
Арсен Венгер "Челси"нинг сенегаллик ҳужумчиси Демба Бани ижарага олмоқчи экан. Ҳали Моуриньо ҳеч нарса дегани йўқ бу ҳақида.
"Хетафе" Лисандро Лопесни бир йилга ижарага олди.
"Реал" ва "Арсенал" Ўзил борасида борига барака қилишди. 47 миллион евро дейишяпти. Энди тиббий кўрик билан боғлиқ масалалар қолди холос. Лондонда Ўзилнинг келишига қаттиқ ишонишмоқда. Шунингдек, "тўпчилар" бугун учинчи катта трансферга ҳам ваъда бермоқдалар. Эслатиб ўтамиз, Ўзилдан ташқари, "Фиорентина"дан Эмилиано Вивиано ҳам "Арсенал"да тўп сурадиган бўлган.
Лейтон Бейнснинг тақдири ҳали ҳам мавҳум. Ҳимоячига "МЮ" қизиқиш билдирган. Аммо, "Эвертон" уни 20 миллион фунтдан камида қўйиб юбормоқчи эмас.
Кимда аза, кимда тўй. Шу сонияларда Мадридда 15-20 минг мухлис гувоҳлиги остида "Келин салом" бошланиш арафасида. Гарет Бэйл чиқади бугун. Унга "11" рақам тегадиган бўлди.
"Каллахона"лик Питер Обемвинге "Вест Бромвич"дан "Кардифф"га ўтишга яқин турибди. "Тоттенхэм"да захирага ўтириб қолаётган камерунлик ҳимоячи Ассу Экоттони эса собиқ мураббийи Ҳарри Реднапп "КПР" га чақиряпти.
Туриб-туриб "Арсенал" нега Вивианони олиб келганига тушуна олмаяпман. Шчесни зўр туряпти-ку, дарвозада?
"Наполи" ҳимоячиси Андре Доссена ҳам "Сандерленд"га ўтиш борасида музокаралар олиб бормоқда.
Ҳаво исиб кетди. Мартино "Барселона"га келгач, ўйин услубини ўзгартирмоқчи бўлибди:
- Бугундан бошлаб, бутунлай бошқача ўйнаймиз. Шу пайтгача нима ўрганган бўлсаларинг, унутинглар. Нолдан бошлаймиз. Мана бу қўлимдаги - футбол тўпи.
Орқадан Иньеста гап қотибди: "Яқинроқдан кўрсак бўладими, устоз?"
goal.com дагилар ғирт "реалчи" экан. Трансферларни унутиб, Бэйлнинг тақдимот маросимидан онлайн қиворишди буёғини.
"Вест Бромвич" "Эвертон"нинг ёш ҳужумчиси Аничебе ва "Сандерленд" ҳужумкор ярим ҳимоячиси Стефан Сессеньонни ҳам сотиб олиш учун музокара олиб бормоқда.
Буёқда Бэйлни намойиш қилишяпти, уёқда бир гуруҳ мухлислар "Месутни сотма" деб бақиришяпти экан. Ҳа, жудаям қизиқ хабар: "Динамо" дарвозабони Шунин "Спартак"ка ўтмайдиган бўлди.
"Сток Сити" "Вердер"дан Арнаутовични олиб келди. Энди бўйи 192 сантиметр бўлган ушбу болқон ҳужумчисини Питер Крауч билан тандемда тасаввур қилаверинг:
Қандайдир "зерикиб қолган" "Наполи" ва "Милан" ўзаро ҳимоячиларни алмаштиришмоқчи. Кристиано Дзаккардо Миландан Неаполга, Паоло Каннаваро эса тескари йўналишда ҳаракатланиши мумкин.
Яна ким сотилииши мумкин, сизнингча? Мисол учун, Ди Мария, Жексон Мартинес, Суарес, Феллайни, Оскар Кардосо, Бурак Йилмаз... Хуллас, кетиб қолманг, қизиқ бўлади.
"Спартак" Сердар Таски учун "Штутгарт"га 3.6 миллион евро тўлабди. Ушбу немис ҳимоячиси яқинда жароҳат олган Бокеттининг ўрнини босиши керак.
Ёшлар ўртасидаги жаҳон чемпионатида ўзини кўрсатган Флориан Товен "Лилль" машғулотларига қатнашишдан бош тортди. Гап сўзларга қараганда, у "Марсельга ўтишга яқин турибди.
"Динамо" (Киев) да ўз ўрнини топа олмаган Нико Кранчар Бундеслигага ўтиши ҳақида гап тарқалди. Таҳминларга кўра, уни "Вердер" сотиб олиши мумкин. Пул бор, Арнаутович сотилди-ку.
Италия грандлари "Ювентус" ва "Интер" эса "Айнтрахт" ҳимоячиси Марк Оливер Кемпф учун курашга киришдилар. Дарвоқе, "Айнтрахт" деганда эсга келди, "Шальке"нинг швейцариялик футболчиси Транкильо Барнетта ушбу жамоа сафига келиб қўшилди.
Лейтон Бейнс масаласи ҳал бўлиш қийинга ўхшайди. Миш-мишларга қараганда, "Юнайтед" Фабио Коэнтран борасида ҳам таклиф тайёрламоқчи экан. Португалиялик чап қанот ҳимоячисига шунингдек, "Тоттенхэм" ҳам қизиқиб қолган.
Ўн соат қолди. "Реал" эса Ўзил учун тўланадиган пулни шундоқлигича, Ливерпулга "перевод" қилдириб юбормоқчи. Луиш Суарес! Старриж деганлари ҳар ўйинда биттадан гол уриб турса етади, дейишяпти, чоғи. :))
Ниҳоят битта сериал ниҳоясига етди. Гарет Бэйл имзолади шартномани. Мен "Шартнома имзолаш чоғида чақмоқ чақиб, барчаси кейинроққа сурилди" қабилидаги хабарларга ҳам тайёр эдим :)
Кейсуки Хонда масаласи ҳам ҳал бўлган кўринади. Маълум бўлишича, япониялик ярим ҳимоячи январгача ЦСКА да тўп суради. Кейин "Милан"га ўтади.
Абель Эрнандес "Палермо" раҳбариятига кетиш ниятини маълум қилди. Эслатиб ўтамиз, футболчига "Арсенал" ва "Сандерленд" қизиқиш билдирган.
Билдим, ўрганиб қолдинглар. Армияда командир аскарлардан сўраяпти:
- Қайси клуб мухлисисан?
- "Юнайтед"
Командир шапалоқ тортиб юборибди:
- Тўлиқ қилиб айт - "Манчестер Юнайтед". Сенчи?
- "Сити"
Яна шапалоқ.
- Тўлиқ айт: "Манчестер Сити". Сеникичи?
- "Манчестер Челси"
Энди тепки! :)
"Эвертон" "Порту"нинг марказий ярим ҳимоячиси Фернандога қизиқиш билдирмоқда. Демак, Феллайни кетади шекилли. Клуб "МЮ"дан Феллайни ва Бейнс учун 50 миллион талаб қиляпти.
Кака "Милан"да 22-рақмда ўйнайдиган бўлди. 10-рақам эса Хондага қолади.
"Халл Сити" "Арсенал"нинг даниялик ҳужумчиси Никлас Бендтнерни олмоқчи. Жируга ўринбосар керак албатта, лекин агар Демба Ба "Арсенал"га келадиган бўлса, Бендтнерга умуман умид қолмаслиги мумкин Лондонда.
"Тоттенхэм" босар тусарини билмай қоляпти. :) Клуб "Зенит"дан Халкни ижарага сўрамоқда ва бир йил учун 10 миллион фунт тўлашга тайёр.
Биздаям бор трансфер хабарлари. Ёзги трансфер ойнасида шартнома шартларини бузгани учун Александр Клецков ва Аҳрол Рисқуллаевлар йил охиригача дисквалификация қилиндилар. Тўлиқроқ хабар сайтда берилди.
"А" Серия тарафлардан дараклар: "Рома" бош мураббийи Руди Гарсия "Нимме Калью"да тўп сураётган 21 ёшли француз яримҳимоячиси Аллан Кимбабулага қаттиқ қизиқиш билдирмоқда. "Лилль" тарбияланувчиси Англияга боришни жуда-жуда истаётган эди, лекин "Рома"нинг ҳам таклифига жон-жон деб рози бўлса керак.
Хорижда Ҳалкнинг сотилмаслиги ҳақида цитаталар янграйверсин, сизни Гарет Бейлнинг тақдимот маросимида изҳор этган дил сўзлари билан манзират айлаймиз:
"Мен бир умр Мадриднинг "Реал"ини кузатганман ва доим унга мухлислик қилганман. Испания чемпионатининг ўйинларини томоша қилардим, бу жуда нуфузли лига! (АПЛчиларга салом! – таҳ.). Мен Роналдуни жаҳоннинг энг яхши ўйинчиси деб ҳисоблайман ва у билан елкама-елка ўйнаш мен учун фахр. Қисман айнан уни деб Мадридга кўчиб ўтиш ҳақида қарор қабул қилдим. Жарима зарбаларини ким ижро этади? Ҳа-ҳа-ҳа, бу ерда босс Роналду, шунинг учун у аниқлайди", – деди Бейл қироллик клуби футболчиси сифатида ўтказган ўзининг илк матбуот анжуманида.
Гаретнинг қўшимча қилишича, ҳозирча у Анчелотти билан бафуржа гаплаша олмаган, шунингдек, кейинги кунларда Уэльс терма жамоаси учун майдонга тушиши, демак, "Реал" футболкасида ҳам ўйнаб кетишга тайёр эканлигини билдириб ўтган.
"Эвертон" (!) "Манчестер Сити"дан Гарет Бэррини ўз таркибига қўшиб олиш учун ҳаракат қилиб кўрди. Бироқ "шаҳарликлар" бу таклифни рад этишди. "Сити"га оид яна бир хабар. "Шаҳарликлар"нинг ёш футболчиси Абдул Раззоқ янги мавсумни Одил Аҳмедов билан ёнма-ён бошлайдиган бўлди — у "Анжи"га ижарага берилди.
Дарвоқе, Бейлнинг трансфери масаласида Барселонадан ҳам реакциялар билдирилмоқда. Гап, 11-рақам учун катта пул сарфланган ва бу футболчи маҳаллий юлдузга салкам сажда қилишга тайёр эканлигини изҳор этган яна бир клуб ҳақда бормоқда. Хуллас, "Барса" спорт директори Андони Субисариетта Бейлнинг Ла-Лигада пайдо бўлиши чемпионат савиясининг ошишига хизмат қилиши, чунончи, рақобат ҳаммани кучайишга ундаши ҳақида гапириб ўтган. Марказий ҳимоячи ҳақида у-бу нарса деганида яхши бўлармиди...
"Атлетик" яримҳимоячиси Андер Эррера маош ҳақидаги талабларини 6 млн. евродан 4 млн. еврогача туширишга рози, фақат "Манчестер Юнайтед"га ўтса бас. Ҳа, баск яримҳимоячилари сўнгги йилларда иссиқ гуммадек сотилиб кетмоқда. Бундай даромадлар билан бутун Басклар Давлатининг иқтисодиётини кўтариб юбориш мумкин: Хави Мартинес – 40, Ильярраменди – 30, Андер Эррера – 36!
Бу орада Белгия миллий футбол федерацияиси Марван Феллайнийга "Юнайтед" билан бамайлихотир шартнома имзолаш учун шароит яратиб, миллий терма жамоа сафига кечроқ қўшилишига изн берди.
