Жорий йилнинг 17 сентябрь – 1 октябрь кунлари пойтахтимизда шахмат бўйича FIDE Гран-присининг учинчи босқич мусобақалари бўлиб ўтади.

Халқаро шахмат федерацияси (FIDE), “Ўзбекистон Маданияти ва санъати Форуми” жамғармаси ҳамда Ўзбекистон шахмат федерацияси ҳамкорлигида ташкил этиладиган мазкур мусобақада дунёнинг 12 нафар энг кучли шахматчи хотин-қизлари ғолиблик учун баҳс олиб борадилар.

Тошкентда ўтказиладиган турнирнинг мукофот жамғармаси 60.000 еврони ташкил этади. Мусобақа ғолиби 10.000 евро миқдорида мукофотга ҳамда 120 очко+40 бонус очколарига эга бўлади.

Хотин-қизлар ўртасидаги FIDE Гран-При мусобақалари олти босқичдан иборат бўлиб, ҳар бир иштирокчи (жами 18 нафар) тўрт босқичда иштирок этиш хуқуқига эга. Барча босқич мусобақаларининг якунларига кўра энг юқори очкога эга спортчи жаҳон тожи учун курашни давом эттиради.

Қуйида Тошкентда бўлиб ўтадиган FIDE Гран-присининг учинчи босқичида иштирок этадиган спортчилар берилган:

GM Хампи Конеру (Ҳиндистон, 2597)
GM Жао Суе (Хитой, 2565)
GM Катерина Лагно (Украина, 2547)
GM Антуанетта Стефанова (Болгария, 2530)
GM Виктория Чмилите (Латвия, 2514)
GM Харика Дронавали (Ҳиндистон, 2510)
WGM Чжу Венчжун (Хитой, 2505)
IM Бела Хотенашвили (Грузия, 2499)
GM Александра Костенюк (Россия, 2495)
GM Элина Даниелян (Арманистон, 2466)
WGM Ольга Гиря (Россия, 2440)
WGM Нафиса Мўминова (Ўзбекистон, 2321).

Хотин-қизлар ўртасида ўтказиладиган FIDE Гран-присининг тақвим жадвали қуйидагича:

2013 йил:
2-14 май – Женева (Швейцария)
15-29 июнь – Дилижон (Арманистон)
17 сентябрь - 1 октябрь – Тошкент (Ўзбекистон)

2014 йил:
2-16 май - Ханти-Мансийск (Россия)
18 июнь - 2 июль – Тбилиси (Грузия)
24 август - 7 сентябрь – Эрденет (Мўғилистон)

Ўзбекистонлик қизлар орасида биринчи бўлиб халқаро гроссмейстер унвонига сазовор бўлган Нафиса Мўминова Женева ва Дилижонда бўлиб ўтган биринчи ва иккинчи босқич мусобақаларида иштирок этмаган. Тажрибали шахматчи қизимиз Тошкент турниридан FIDE Гран-присидаги иштирокини бошлайди ва Ханти-Мансийск, Тбилиси ҳамда Эрденетда ўтказиладиган қолган босқич мусобақаларда ҳам ғолиблик учун баҳс олиб боради.

Эслатиб ўтамиз, 2012 йилнинг 21 ноябрь – 4 декабрь кунлари Тошкент шаҳрида эркаклар ўртасида FIDE Гарн-присининг иккинчи босқич мусобақалари зўр муваффақият билан ўтказилган эди.