"Манчестер Сити" ярим ҳимоячиси Бернарду Силва келаётган ёзда "Бенфика"га қайтмайди.
Португалиялик футболчи "шаҳарликлар" сафини тарк этмоқда — мавсум якунлангач, у эркин агентга айланади. "Бенфика" ўйинчига асосий даъвогарлардан бири сифатида қаралаётган эди, бироқ хавбекнинг ўзи Лиссабонга қайтишни ҳозирча кутмаслик кераклигини маълум қилди.
"Мен жон деб қайтган бўлардим, лекин ҳозир эмас. Ўша пайтда "Бенфика"га керак бўламанми-йўқми, бунисини билмайман", — дея журналист Фабрицио Романо Силванинг сўзларидан иқтибос келтирди.
"Сити"нинг 31 ёшли сардори учун асосий даъвогарлар сифатида "Барселона" ва "Ювентус" тилга олинмоқда. Тахминларга кўра, футболчининг ўзи "кўк-анорранглилар" сафига қўшилишни афзал кўрмоқда, бироқ "кекса синьора" анча фаолроқ ҳаракат қилмоқда.
