Италиялик ҳужумчи Стефан Эль-Шаарави мавсум якунида «Рома»ни тарк этади. Бу ҳақда 33 ёшли футболчи ўзининг ижтимоий тармоқларидаги саҳифаларида маълум қилди.
Футболчи илк бор «Рома»га 2016 йилнинг январь ойида кўчиб ўтган эди. Ўша пайтдаёқ у «Милан»даги ажойиб ўйинлари эвазига А Сериянинг энг иқтидорли вингерларидан бири ҳисобланарди. 2019 йилнинг ёзида у Хитойга йўл олиб, «Шанхай Шэньхуа» клубида тўп сурди, бироқ 2021 йилнинг январида яна Рим клубига қайтди. Шундан бери Эль-Шаарави жамоа таркибининг барқарор аъзосига айланган эди.
«Рома»даги икки даври давомида у жами 346 та ўйинда майдонга тушиб, 65 та гол урди ва 50 та голли узатмани амалга оширди. Унинг Рим клубидаги энг катта ютуғи Жозе Моуриньо бошқаруви остида 2021/22 йилги мавсумда УЕФА Конференциялар лигасида қозонилган ғалаба бўлди.
Бош мураббий Жан Пьеро Гасперини бир қатор футболчилар, жумладан, Эль-Шаарави билан ҳам шартнома узайтирилишини истаган эди, бироқ томонлар ўзаро келишувга эриша олишмади. Шундан сўнг футболчи жамоадан кетишга қарор қилди.
