«Ньюкасл»нинг собиқ ҳужумчиси Алан Ширер «Манчестер Сити»нинг Англия Кубоги финалида Лондоннинг «Челси» жамоаси устидан қозонган минимал ҳисобдаги ғалабасига муносабат билдирди.
«Бу балки энг яхши ўйин бўлмагандир, лекин «шаҳарликлар» ғалабага эришиш учун жиддий куч сарфлашларига тўғри келди», — дея собиқ футболчининг сўзларини келтиради BBC Sport.
Эслатиб ўтамиз, Англия Кубогининг финал учрашуви «Уэмбли» стадионида бўлиб ўтди. Хосеп Гвардиола шогирдлари «аристократлар»ни 1:0 ҳисобида мағлуб этишди. Учрашувнинг иккинчи бўлимида ягона голни ганалик ярим ҳимоячи Антуан Семеньо киритди. Шу тариқа, «Манчестер Сити» ўз тарихида саккизинчи бор мамлакат кубоги соҳибига айланди.
