Бугун Каземиро «Манчестер Юнайтед» таркибида «Олд Траффорд» стадионидаги ўзининг сўнгги учрашувини ўтказади. Бразилиялик футболчи мавсум якунида клубни эркин агент мақомида тарк этади, бу ҳақда шу йилнинг бошидаёқ маълум бўлган эди.
Таниқли журналист Sam C хабарига кўра, «қизил иблислар» мухлисларидан Каземирога ҳурмат бажо келтириш учун якшанба кунги «Ноттингем Форест»га қарши баҳс бошланишидан аввалроқ стадиондаги жойларини эгаллаш сўралган. Фан-трибунада ярим ҳимоячига бағишланган улкан баннер ёзилади.
Бундан ташқари, Каземиро билан ўйин тугаганидан кейин ҳам хайрлашилади, шундан сўнг бош мураббий Майкл Кэррик стадионга йиғилган томошабинлар қаршисида нутқ сўзлайди. «Манчестер Юнайтед» ва «Ноттингем Форест» ўртасидаги учрашув Тошкент вақти билан 16:30 да бошланади.
