Лондоннинг «Челси» клуби яқин йилларда Англия Премьер-лигасида (АПЛ) чемпионлик учун курашиш тизимини йўлга қўймоқчи. Бугун лондонликлар испаниялик мутахассис Хаби Алонсо жамоа бош мураббийи этиб тайинланганини расман эълон қилди. У клубда менежерлик вазифаларини ҳам бажаради. Томонлар ўртасидаги шартнома тўрт йилга мўлжалланган.

Daily Mail нашрининг ўз инсайдерларига таяниб хабар беришича, «кўклар» раҳбарияти яқин уч мавсум ичида, имкон қадар тезроқ бош соврин учун асосий даъвогарлардан бирига айланишни мақсад қилган.

Шунингдек, манбада қайд этилишича, «Челси» раҳбарияти «Ливерпуль» клубида мураббийлик курсиси бўшаб қолиши мумкинлигини олдиндан тахмин қилган. Испаниялик мутахассиснинг тайинлови мавсум якунланмасдан туриб, ҳозироқ эълон қилинганининг сабаби ҳам айнан шу хавф билан изоҳланмоқда. Мерсисайдликлар Алонсога таклиф билан чиқишидан олдин «Челси» тезкорлик кўрсатган.

Испаниялик мутахассис янги лавозимида жорий йилнинг 1 июлидан иш бошлайди. У жорий мавсумнинг қолган учрашувларига жамоани тайёрлаш жараёнларига умуман аралашмайди.