Нуфузли инсайдер Альфредо Мартинеснинг хабар беришича, "Барселона" раҳбарияти "Вильярреал" етакчиси Альберто Молейруни сотиб олишга жиддий қизиқиш билдирмоқда.
Манба берган маълумотларга кўра, каталонияликлар клуби вакиллари кутилаётган эҳтимолий трансфер тафсилотларини муҳокама қилиш мақсадида айни пайтда 22 ёшли футболчининг яқин атрофидаги инсонлар билан фаол равишда алоқа ўрнатишган. Шартномада товон пули сифатида 50 миллион евролик маблағ кўрсатилган бўлишига қарамай, "Вильярреал" раҳбарияти ён босишга ва трансфер нархини пасайтиришга тайёр.
Ушбу трансфер сагасида футболчининг шахсий хоҳиши муҳим омил бўлиши мумкин. Хабар қилинишича, Альберто Молейру болалигидан "Барселона"нинг ашаддий мухлиси ҳисобланади, шу сабабли "кўк-анорранглилар" сафига ўтиш у учун фаолиятини давом эттиришнинг энг устувор вариантидир.
