Роберт Левандовски «Барселона»да тўрт йил давомида тўп сурган бўлса-да, клубнинг энг яхши тўпурарлари рейтингидан жой олишга улгурди. Польяк миллатига мансуб ҳужумчи «кўк-анорранглилар» сафида барча турнирларда умумий ҳисобда 192 та ўйинда майдонга тушиб, 119 та гол уришга муваффақ бўлди — бу клуб тарихидаги 11-натижа, легионерлар ўртасида эса 7-кўрсаткичдир, деб хабар бермоқда Opta.

«Барса»да ўйнаган барча хорижлик футболчилар ичида фақат Патрик Клюйверт (121), Ривалдо (130), Самюэль Это'О (130), Ладислав Кубала (194), Луис Суарес (198) ва Лионель Месси (672) польяк ҳужумчисидан кўпроқ гол уришган.

Левандовски Каталония гранди сафини 2022 йилнинг ёзида Мюнхеннинг «Бавария» клубидан кўчиб ўтиб тўлдирган эди. Якшанба куни форварднинг «Барселона» таркибида ўз майдонидаги хайрлашув учрашуви бўлиб ўтди: у «Бетис»га қарши баҳсда (3:1) асосий таркибда майдонга тушди, бироқ рақиб дарвозасини ишғол эта олмади. Мавсум якунида 37 ёшли футболчи эркин агентга айланади.