Франциянинг «Марсель» клуби учун жуда шиддатли ва нотинч ўтган мавсум якунига етмоқда. Бу мавсум Мехди Бенатианинг клубни расман тарк этаётгани ҳақидаги хабар билан ниҳоясига етяпти.
Бу ҳақда анча олдин маълум эди — Бенатиа ҳали қишдаёқ кетишини эълон қилган, бироқ кейинроқ мавсум охиригача қолишга қарор қилган эди.
Кейинги мавсумни «Марсель» бутунлай бошқача қиёфада — янги раҳбарият ва янги футболчилар билан ўтказади.
Эслатиб ўтамиз, Прованс клуби якунланаётган мавсумни Роберто де Дзерби бошқарувида бошлаган эди. Бироқ ҳали август ойидаёқ Адриен Рабио жанжал билан жамоани тарк этди, январь ойи бошида эса Чемпионлар лигасидан чиқиб кетилгач, италиялик мутахассис борасида ҳам раҳбариятнинг сабр косаси тўлди ва томонлар ўзаро хайрлашишди.













