Флорентино Переснинг «Реал» президентлиги учун бўладиган сайловларда барибир рақиби пайдо бўладиган кўринади.

El Confidencial нашрининг хабар беришича, «Cox Energy» энергетика компанияси раҳбари Энрике Рикельме, клубнинг амалдаги раҳбарияти томонидан ўрнатилган кўплаб тўсиқларга қарамай, ўз номзодини қўйишга қарор қилган.

Бизнесменнинг фикрича, кетма-кет иккита муваффақиятсиз мавсум ва обрў инқирозидан сўнг «Реал»га муқобил йўл керак. Яқинлари Рикельмени ғалаба қозониш имконияти паст эканлигидан огоҳлантиришган бўлса-да, у барибир раҳбарлик лавозими учун курашиши шарт деган хулосага келди.

Тадбиркор аллақачон бир нечта банклардан кафолат олишга улгурган — улар бизнесменга 194 миллион евро тақдим этиш мажбуриятини бўйинларига олишган. Маълумот учун, Переснинг ўзи бундай кафолатни тақдим этишга мажбур эмас.

Рикельме сайловда яна бир қатор чекловларга дуч келади. Таъкидланишича, ушбу чекловлардан кўзланган мақсад — сайловларни рақобатсиз (яъни фақат бир киши иштирокида) ўтказишдир. Масалан, номзод кампанияда иштирок этиш нияти ҳақида расмий муддат тугашидан икки кун олдин (23 май эмас, балки 21 май куни) клубни хабардор қилиши керак. Бундан ташқари, унга клуб аъзоларининг (сосьос) рўйхати берилмайди, демак у сайловчилар билан тўғридан-тўғри боғлана олмайди. Тарғибот материалларини тарқатиш билан эса «Реал» клубининг ўзи шуғулланади.