«Арсенал» бош мураббийи Микель Артета эндиликда «Борнмут»нинг тарихдаги энг ашаддий мухлиси эканлигини ҳазил билан маълум қилди.

19 май куни АПЛнинг 37-тури доирасида «Борнмут» ўз майдонида «Манчестер Сити»ни қабул қилади. Агар Пеп Гвардиола жамоаси ушбу ўйинда ғалаба қозона олмаса, «Арсенал» чемпионликни қўлга киритади.

Артета ушбу баҳсда «Борнмут»га мухлислик қилиш-қилмаслиги ҳақидаги саволга шундай жавоб берди.

«Тарихдаги энг ашаддий мухлис бўламан! Ўйлашимча, барчамиз «Борнмут» мухлисига айланамиз, чунки улар ижобий натижага эришса, бу нимани англатишини яхши тушуниб турибмиз.

Андони Ираолага бирон-бир хабар юборишимга ҳожат йўқ деб ўйлайман. Унинг бу клубда қилган ишлари, клубнинг қандай ўзгаргани ва қандай ўйнаётгани — бунинг учун бошқа ҳеч нарса керак эмас», — дея қўшимча қилди Микель Артета.