«Барселона» клуби Роберт Левандовски жамоадан кетганидан сўнг унинг ўрнини босадиган асосий номзод ким эканлигини аниқлаб олди.

Mundo Deportivo нашри хабарига кўра, каталонияликлар учун устувор вариант «Челси» ҳужумчиси Жоао Педро бўлиб турибди. «Барселона» спорт директори Деку бир неча ҳафтадан бери футболчининг вакиллари билан алоқада бўлиб турибди. Педронинг ўзи ҳам Каталония клубига ўтиш эҳтимолига ижобий қарамоқда ва фаолиятини ушбу жамоада давом эттиришга қизиқиш билдирмоқда.

Шу билан бирга, «Челси» 24 ёшли ҳужумчини осонликча қўйвориш ниятида эмас, чунки унинг клуб билан шартномаси 2033 йилга қадар мўлжалланган. Англия клуби футболчи учун тахминан 100 миллион евро талаб қилиши мумкинлиги хабар қилинмоқда. Вазиятга таъсир қилиши мумкин бўлган омиллардан бири сифатида «Челси»нинг кейинги мавсумда Чемпионлар Лигаси йўлланмасидан қуруқ қолгани кўрсатилмоқда.