«Интер» клуби шу ёзда ҳимоя чизиғини кучайтиришни режалаштирмоқда.
Calciomercato нашрининг Corriere dello Sport га таяниб хабар беришича, миланликлар ўзларининг потенциал трансфер нишонлари рўйхатига Рональд Араухо («Барселона») ва Лука Вушковични («Тоттенхэм», ҳозирда ижара асосида «Гамбург»да ўйнамоқда) киритишган.
Ички бозорда (Италияда) эса Милан клубини энг кўп қизиқтираётган футболчилар Тарик Мухаремович («Сассуоло») ва Умар Соле («Удинезе») бўлиб турибди.
Кутилишича, Италия чемпионлари таркибини Франческо Ачерби ва Маттео Дармиан эркин агент сифатида тарк этади. Шартномаси якунига етаётган Ачерби Симоне Индзаги бошқараётган «Ал-Ҳилол» клубига йўл олиши, Дармиан эса собиқ жамоаси — «Торино»га қайтиши мумкин.
