«Манчестер Сити» мухлислари АПЛ чемпионлиги қўлдан чиқарилганига қарамай, бош мураббий Пеп Гвардиоладан клубда қолишни илтимос қилишди.
«Шаҳарликлар» АПЛ 37-турида сафарда «Борнмут» билан дуранг ўйнаб (1:1), Премьер-лигада иккинчи ўринни банд этишди, «Арсенал» эса муддатидан олдин чемпионликни расмийлаштирди.
«Дин Корт» стадионидаги учрашув якунланганидан сўнг, 55 ёшли каталониялик мутахассис футболчилар билан биргаликда меҳмонлар учун ажратилган секторга яқинлашиб, мухлисларга қўллаб-қувватлаганлари учун миннатдорчилик билдирди. Пеп ортига бурилиб, трибуна остидаги йўлак сари йўл олган вақтда, фанатлар бараварига: «Яна бир йил, Гвардиола!» дея қўшиқ куйлай бошлашди.
Эслатиб ўтамиз, аввалроқ «Челси»нинг собиқ устози Энцо Мареска 2016 йилдан буён жамоани бошқариб келаётган Гвардиоланинг ўрнини эгаллаши ҳақида хабарлар тарқалган эди.
