«Наполи» ва «Аталанта» клублари бош мураббий Маурицио Саррини ўз сафига қўшиб олиш учун кураш олиб бормоқда.

Журналист Альфредо Педулланинг берган маълумотларига кўра, неаполитанликлар ўзларининг собиқ мураббийига йиллик маоши 2,7 миллион евро бўлган икки йиллик шартнома таклиф қилишган. Бундан ташқари, ушбу келишувда жамоанинг А Серия ва Чемпионлар Лигасидаги натижаларига қараб бериладиган бонуслар ҳам кўзда тутилган. Ушбу вариант 67 ёшли мутахассис учун анча жозибали туюлмоқда, бироқ у ҳали якуний қарорга келмаган ва ҳозирча ҳеч қандай расмий келишувга эришилмаган.

Шу билан бир вақтда, «Аталанта» клуби ҳам Саррини таклиф қилиш устида фаол иш олиб бормоқда. Бергамоликлар мураббийга молиявий жиҳатдан кўпроқ маош ваъда қилишмоқда, шунингдек, икки йиллик шартномага уни яна узайтириш бандини қўшиш ёки бир йўла уч йиллик контракт тақдим этишга тайёр. Бугун «Аталанта»нинг бўлажак спорт директори Кристиано Джунтоли мураббий билан шахсан суҳбатлашган ва унга бўлаётган босим жуда «жиддий» экани айтилмоқда.

Айни пайтда Маурицио Сарри «Лацио» клубини бошқармоқда. Жорий мавсумда Рим жамоаси Италия Кубоги кумуш медалларига эга чиқди, мамлакат чемпионатида эса 9-ўринда бормоқда ва қолган баҳсларда бундан юқорироқ кўтарила олмаслиги аниқ бўлган.