«Арсенал» клуби собиқ ярим ҳимоячиси Гранит Жака жамоанинг чемпионликни қўлга киритганидан кейинги таассуротлари билан ўртоқлашди. Ҳозирда «Сандерленд» шарафини ҳимоя қилаётган швейцариялик футболчи «канонирлар»нинг муваффақиятига муносабат билдириб, ижтимоий тармоқлардаги саҳифасида пост қолдирди.

«Ўзгача жамоа, ажойиб футболчилар. Муваффақиятга бўлган ишончини ҳеч қачон йўқотмаган клуб. Буларнинг барчаси сенинг шарофатинг билан, Микель [Артета]. Барча шубҳа қилганлар мураббийнинг меҳнатини муносиб баҳолашлари ва унга ҳурмат кўрсатишлари керак. Бутун «Арсенал» оиласини табриклайман. Бир марта «канонир» бўлдингми — демак, бир умр «канонир»сан», — деб ёзди Жака.

«Арсенал» 22 йил ичида илк бор чемпионлик шоҳсупасига кўтарилди. Титул тақдири сешанба куни бўлиб ўтган «Манчестер Сити» ва «Борнмут» ўртасидаги учрашувда қайд этилган дуранг (1:1) натижасидан сўнг ҳал бўлди.