«Барселона» ярим ҳимоячиси Френки де Йонг Маркус Рэшфорднинг клубда қолиш имкониятлари ҳақида гапирди. Эслатиб ўтамиз, жорий мавсумда Рэшфорд «Барселона» сафида ижара асосида тўп сурмоқда. Унинг трансфер ҳуқуқи «Манчестер Юнайтед» клубига тегишли.

«Рэшфорд жамоада қолиш ҳуқуқини муносиб равишда қўлга киритди. У голлар урди, голли узатмаларни амалга оширди, ўйинимизга ранг-баранглик ва тезлик олиб кирди. Агар у таркибда қолса, мен жуда хурсанд бўламан. Рэшфорд катта шов-шувлар остида келганди. Унинг жамоада қолишни истаётгани дастлабки дақиқаларданёқ кўриниб турган эди», — дея де Йонгнинг сўзларини келтирмоқда «Barça Universal» нашри.

Жорий мавсумда 28 ёшли Рэшфорд барча турнирларда 48 та учрашувда майдонга тушиб, 14 бор рақиблар дарвозасини ишғол қилди ва 14 та голли узатма муаллифига айланди.