Андижон шаҳрида барча қулайликларга эга ихтисослаштирилган болалар ва ўсмирлар олимпия захиралари теннис мактаби фойдаланишга топширилди.

Президентимиз Ислом Каримов раҳнамолигида болалар спортини ривожлантириш, ёш авлоднинг спорт билан мунтазам шуғулланиши учун зарур шароитлар яратишга алоҳида эътибор қаратилмоқда. Болалар спортини ривожлантириш жамғармаси томонидан Андижон шаҳрида бунёд этилган ихтисослаштирилган болалар ва ўсмирлар олимпия захиралари теннис мактаби ҳам ана шу ғамхўрликнинг амалий ифодасидир.

– Мазкур иншоот қурилишига Ўзбекистон Болалар спортини ривожлантириш жамғармаси томонидан 1 миллиард 846 миллион сўм маблағ ажратилди, – дейди мактаб директори Лайло Сагадеева. – Замонавий лойиҳалар асосида барпо этилган ва 250 нафар бола катта теннис билан мунтазам шуғулланиш имконияти мавжуд бўлган мактабдаги очиқ ва ёпиқ кортлар, сауна, душ, тиббиёт хонаси ўқувчилар ихтиёрида.

Очилиш маросими вилоятдаги туман ва шаҳар жамоалари иштирокидаги мусобақага уланиб кетди. Беллашувлар якунига кўра, Андижон шаҳри жамоаси умумжамоа ҳисобида биринчи, Марҳамат тумани вакиллари иккинчи, Қўрғонтепа туманининг ёш теннисчилари учинчи ўринни эгаллади.

Тадбирда Андижон вилояти ҳокими Ш.Абдураҳмонов сўзга чиқди.